Երեխաների նկատմամբ սեռական բռնությունը և շահագործումը (CSEA) ամբողջ աշխարհում ճանաչվում է որպես հանրային առողջության լուրջ խնդիր և երեխաների իրավունքների կոպիտ խախտում:
Երեխաների նկատմամբ սեռական շահագործման և բռնության վերաբերյալ հետազոտական նախաձեռնությունների շուրջ համագործակցության շրջանակներում 2025թ․ մարտի 31-ին Հանրապետական մանկավարժահոգեբանական կենտրոնում տեղի ունեցավ հանդիպում «Աստրա» հիմնադրամի ծրագրի ղեկավար, սոցիոլոգիական գիտությունների թեկնածու դոկտոր Վերոնիկա Օդինոկովայի, «Երեխաների պաշտպանության կենտրոն» հիմնադրամի գործադիր տնօրեն, Սոցիալական աշխատողների հայկական ասոցիացիայի նախագահ սոցիոլոգիական գիտությունների թեկնածու, ԵՊՀ դոցենտ դոկտոր Միրա Անտոնյանի, ԵՊՀ սոցիալական աշխատանքի և սոցիալական տեխնոլոգիաների ամբիոնի վարիչ, սոցիոլոգիական գիտությունների թեկնածու, դոցենտ դոկտոր Յուլիանա Մելքումյանի և ԵՊՀ դասախոս Տաթևիկ Կարապետյանի հետ:
ՀՄԿ տնօրեն Լիլիթ Մնացականյանը, ողջունելով հյուրերին, ընդգծեց այս ոլորտում համագործակցության և համատեղ ծրագրերի իրականացման անհրաժեշտությունը։ Ծրագրի պատասխանատուները, կարևորելով 12-17 տարեկան երեխաների շրջանում սեռական շահագործման և բռնության վերաբերյալ հետազոտությունների իրականացումը, ներկայացրեցին հատուկ մշակված հարցաշար, որով նախատեսվում է իրականացնել հարցումներ։ Քննարկման ընթացքում ՀՄԿ մասնագետների կողմից արվեցին մեթոդական առաջարկություններ հարցաշարը լավարկելու և դրա արդյունավետությունը բարձրացնելու նպատակով։
Այս հետազոտությունների նպատակն է նպաստել Հայաստանում երեխաների նկատմամբ սեռական շահագործման և բռնության տարածվածության վերաբերյալ բնակչության շրջանում հարցումների մշակմանը և իրականացմանը՝ հավաքագրելով տվյալներ այն մշակութային, սոցիալական և համատեքստային գործոնների վերաբերյալ, որոնք նպաստում են սեռական շահագործման և բռնության նկատմամբ խոցելիությանը Հայաստանում։
Ծրագրի ակնկալվող սոցիալական ազդեցությունները ներառում են սեռական շահագործման և բռնության մասին հանրային իրազեկվածության բարձրացում, թեմայի շուրջ բաց քննարկումների խթանում Հայաստանում, շահագրգիռ կողմերի ներգրավվածության ավելացում սեռական շահագործման և բռնության տվյալների օգտագործման և ակադեմիական հետազոտությունների առաջխաղացում այդ թեմայի շուրջ:
Ծրագրի շրջանակներում կմշակվեն նաև ուղեցույցներ Հայաստանում սեռական շահագործման և բռնության տարածվածության հարցում անցկացնելու համար, որը կծառայի որպես արժեքավոր ռեսուրս ապագա հետազոտությունների և քաղաքականություն մշակման համար։
02.04.2025
