Մենք կարևորում և արժևորում ենք ուսումնական գործընթացում ընդգրկված բոլոր մասնակիցների՝ սովորողների, ծնողների, մանկավարժների, դպրոցի վարչական աշխատակիցների և այլ մասնագետների տեսակետներն ու կարծիքները կրթության կազմակերպման գործընթացի ներառականության ապահովման հարցում։ Այդ նպատակով մշակվել է «Դպրոցներում ներառականության գնահատման գործիքը», որը ևս մեկ ձեռքբերում է բոլորիս համար։
ՀՀ կրթության, գիտության, մշակույթի և սպորտի նախարարի 2025 թվականի մարտի 12-ի N670-Ա2 հրամանով «Հայկական Կարիտաս» բարեսիրական հասարակական կազմակերպության կողմից իրականացվող «Նպաստել Հայաստանում բոլորի համար ներառական և համապատասխան որակյալ կրթության կայացմանը» ծրագրի շրջանակում Հանրապետական մանկավարժահոգեբանական կենտրոնի կողմից մշակված «Դպրոցներում ներառականության գնահատման գործիք»-ը երաշխավորվել է գործածության։
Գործիքը մշակվել է Հանրապետական մանկավարժահոգեբանական կենտրոնի մասնագիտական թիմի կողմից «Հայկական Կարիտաս» բարեսիրական հասարակական կազմակերպության (ԲՀԿ) ֆինանսական աջակցությամբ:
Նախապես ուսումնասիրվել է դպրոցներում կրթության կազմակերպման գործընթացի ներառականության գնահատման տեղական ու միջազգային փորձը և ուսումնասիրությունների արդյունքում փորձագիտական խմբի կողմից մշակվել է դպրոցներում կրթության կազմակերպման ներառականությունը գնահատող գործիքը, որը կարող է կիրառվել ինչպես ներքին, այնպես էլ արտաքին գնահատման համար։
Գործիքի կիրառումը հնարավորություն կտա իրականացնել դպրոցներում կրթական գործընթացի կազմակերպման ներառականության վերաբերյալ թիրախային հետազոտություններ՝ վեր հանելով կրթական գործընթացում ընդգրկված բոլոր կողմերի տեսակետներն ու կարծիքները դրա վերաբերյալ:
Գործիքը գնահատում է ներառական կրթության կազմակերպման գործընթացը 6 հիմնական բաղադրիչներով՝
- ✦ Հասանելի (ֆիզիկական) միջավայր
- ✦ Ներառական կրթության իրականացման համար անհրաժեշտ նյութատեխնիկական ապահովվածություն
- ✦ Դասավանդման մեթոդներ
- ✦ Ուսուցիչների վերապատրաստվածություն
- ✦ Ներառական կառավարում
- ✦ Վերաբերմունք և խտրականություն
Այն ներառում է 5 տարբեր հարցաթերթեր վարչական աշխատողների, մանկավարժական աշխատողների, ծնողների և սովորողների համար։
Դպրոցներում ներառականության գնահատման գործիքը նախատեսված է հանրակրթական ուսումնական հաստատություններում կրթության կազմակերպման գործընթացի ներառականության գնահատման նպատակով՝ վեր հանելու ուսումնական գործընթացում ընդգրկված բոլոր կողմերի՝ սովորողների, ծնողների, մանկավարժների, դպրոցի վարչական աշխատակիցների և այլ մասնագետների տեսակետներն ու կարծիքները կրթության կազմակերպման գործընթացի ներառականության տարբեր բաղադրիչների վերաբերյալ:
Գործիքի կիրառման արդյունքում վերհանված տվյալները կարող են օգտագործվել ՀՀ-ում ներառական կրթության արդյունավետության բարձրացման, զարգացման և կատարելագործման նպատակով, ինչպես նաև կօգնեն կոնկրետ դպրոցին առավել որակյալ արձագանքել իր առջև դրված արդի պահանջներին:
20.03.2025
