ԾԱՆՈԹԱՆՈՒՄ ԵՆՔ ԿԱՎԻՆ
Նպատակ
Երեխաներին ծանոթացնել կավի տարբեր հատկություններին, զարգացնել շոշափողական ընկալումները, թուլացնել մկանային լարվածությունը:
Անհրաժեշտ նյութեր
Կավ, փայտե տախտակներ, ջուր, կավագործական գործիքներ:
Ընթացք
Մասնագետի հրահանգով կամ օգնությամբ երեխաները տրորում են կավը, սեղմում այն, ձգում, հետո՝ հարթեցնում, գրտնակում, անցքեր բացում նրա վրա, համապատասխան գործիքի միջոցով կտրում, ոլորում և այլն:
Ցուցումներ
Այս վարժությունը կավաթերապիայի նախապատրաստական փուլն է, որի ընթացքում երեխաները ծանոթանում են կավի տարբեր հատկություններին: Եթե երեխան չի կարողանում կատարել անհրաժեշտ հրահանգները, ապա սկզբնական շրջանում մասնագետը օգնում է նրան։
ԿԱՎԵ ԽՆՁՈՐՆԵՐ
Նպատակ
Ձևավորել հաղորդակցման հմտություններ, կարգավորել շարժումների կոորդինացիան, ուժն ու ճշգրտությունը, ակտիվացնել ակամա ուշադրությունը, զարգացնել շոշափողական ընկալումները և մանր շարժունակությունը։
Անհրաժեշտ նյութեր
Կավ, փայտե տախտակներ, փոքրիկ զամբյուղ, ջուր, կավագործական գործիքներ:
Ընթացք
Մասնագետը խնդրում է երեխաներին պատրաստել խնձորներ և լցնել զամբյուղի մեջ։ Նա վերցնում է կավի մի կտոր և, տրորելով ձեռքերի ափերով, ստանում է փոքրիկ խնձոր: Հետո կավի մի ուրիշ կտոր դնում է երեխաների ափերի մեջ, որպեսզի նրանք ևս փորձեն ստանալ նույնպիսի խնձորներ: Պատրաստված խնձորները լցվում են զամբյուղի մեջ: Պետք է պատրաստել այնքան խնձոր, որքան անհրաժեշտ կլինի զամբյուղը լցնելու համար:
Ցուցումներ
Եթե երեխան չի կարողանում ինքնուրույն պատրաստել, ապա սկզբնական շրջանում մասնագետը օգնում է նրան։
ԱԼԻՔՆԵՐ ԳԵՏԻ ՄԵՋ
Նպատակ
Զարգացնել շոշափողական ընկալումները և մանր շարժունակությունը, կարգավորել շարժումների կոորդինացիան, կենտրոնացնել ուշադրությունը, թուլացնել մկանային լարվածությունը։
Անհրաժեշտ նյութեր
Կավ, փայտե տախտակներ, գետի նկար, ջուր:
Ընթացք
Մասնագետը խնդրում է երեխաներին կավից պատրաստել ալիքներ և նրանցով ծածկել նկարում պատկերված գետը: Դրա համար նա վերցնում է կավի մի կտոր և, ձեռքերով երկարացնելով ու կավե երկար ժապավեն ստանալով, ոլորում է` ալիքի ձև հաղորդելով նրան: Հետո երեխաներին տալիս է կավի ուրիշ կտորներ, որպեսզի նրանք նույնպես պատրաստեն նույնպիսի կավե «ալիքներ»: Պատրաստված ալիքներով ծածկում են գետի նկարը:
Ցուցումներ
Եթե երեխան չի կարողանում ինքնուրույն կատարել հրահանգը, ապա սկզբնական շրջանում մասնագետը օգնում է նրան։