Հոգեբանական ծառայություն

Մանկավարժության և հոգեբանության արդի խնդիրներից է երեխաների հոգեկան, մտավոր, ինչպես նաև` ֆիզիկական զարգացման գործընթացում նոր, ավելի արդյունավետ մեթոդների ներմուծումն ու կիրառումը: Հոգեբաններն ու մանկավարժները փաստում են, որ երեխայի մտավոր և հոգեկան զարգացումը սերտորեն կապված է նրա շարժունակության զարգացման հետ:

Շարժումը բնական միջոց է երեխայի աշխարհընկալման և սեփական «ես»-ի ճանաչման համար: Այդ իսկ պատճառով նրանք սիրում են խաղալ, շարժվել, վազել և ինքնաբուխ պարել: Հետևելով մեծերին, կրկնելով և կատարելագործելով սեփական շարժումները`երեխան սովորում է զգալ, ընկալել և հաստատել կապը շրջակա միջավայրի հետ: Այսօր երեխաների հետ աշխատանքում իր նշանակալի տեղն է զբաղեցնում պարաշարժողական թերապիան: Հաճախ հանդիպում են երեխաներ, որոնց մոտ դիտվում են՝

• ուշադրության անբավարարություն
• շարժողական անփութություն
• ցրվածություն
• գերլարվածություն
• ինֆանտիլիզմ
• խոսքի զարգացման տարբեր խնդիրներ
• գերակտիվություն
• հուզական լարվածություն
• վարքի շեղումներ և այլ խնդիրներ:

Պարաշարժողական թերապիան իր դրական ազդեցությունն է թողնում ԿԱՊԿՈՒ երեխաների հետ աշխատանքում։

Պարը և շարժումը համարվում է «մարմնի լեզու», որով կարող են հաղորդակցվել բոլորն` առանց բացառության, այն զգացմունքների արտահայտման, հոգեբանական խնդիրների լուծման, մկանային լարվածության կարգավորման, անձի լիարժեք ձևավորման և զարգացման մատչելի ու արդյունավետ միջոց է:

Պարային թերապիան և պարային խաղերը տալիս են երեխային հնարավորություն՝

• վերարտադրել սեփական ագրեսիան և վախը
• խաղարկել սեփական արտաքին և ներքին զգացողությունները, որոնք օգնում են ավելի լավ հասկանալ սեփական «ես»-ը և իր ներքին աշխարհը
• միասին վերապրել հուզող իրավիճակներ այլ երեխաների և մեծահասակների հետ
• զարգացնել ստեղծագործական հմտությունները, փորձարկել սեփական մարմնով և շարժումներով
• զարգացնել էսթետիկ զգացողությունները և ստանալ զգայական բավարարվածություն և ուրախություն սեփական մարմնի զգացումից: