ՀՀ հանրակրթության ոլորտում համընդհանուր ներառական կրթության արդյունավետ ներդրման և իրականացման շրջանակներում 2019թ. փետրվարին «Հանրապետական մանկավարժահոգեբանական կենտրոն» ՊՈԱԿ-ը՝ ի դեմս տնօրեն Լիլիթ Ասրյանի և «Իմ ուղին» վերականգնողական կենտրոնը, ի դեմս տնօրեն Լիլիթ Աթաջանյանի, կնքեցին համագործակցության հուշագիր՝ վերապատրաստման դասընթացների համատեղ կազմակերպման, ինչպես նաև՝ կրթության առանձնահատուկ պայմանների կարիք ունեցող երեխաների գնահատման գործընթացում խորհրդատվության և աջակցության իրականացման նպատակով: Հուշագրի իրականացման շրջանակներում կատարվեց առաջին քայլը և փետրվարի 15-ին Հանրապետական մանկավարժահոգեբանական կենտրոնում տեղի մասնագետների համար կայացավ «Ներառական կրթությունը գործնականում» թեմայով սեմինարը, որը վարեց «Իմ ուղին» ուսումնական վերականգնողական ցերեկային կենտրոնի մասնագետ Սյուզաննա Պետրոսյանը: Սեմինարին կհաջորդեն շարունակական վերապատրաստման դասընթացները, որոնց հիմքում ընկած են սեմինարավարի մասնագիտական մշակումներն ու գործնական աշխատանքները: Սեմինարն ընթացավ ակտիվ քննարկումների և փորձի փոխանակման ջերմ մթնոլորտում:
