2025-2026 ուսումնական տարվան ընդառաջ՝ օգոստոսի 18-29-ը տեղի ունեցան հերթական օգոստոսյան խորհրդակցությունները, որոնք ամփոփվեցին Երևանում հանրակրթական դպրոցների տնօրենների ու վարչատնտեսական համակարգողների մասնակցությամբ։
Խորհրդակցությունների նպատակն էր քննարկել գալիք ուսումնական տարվա անելիքները, հստակեցնել առաջնահերթությունները։
Հանդիպումների ընթացքում ի մի են բերվել 2024-2025 ուստարվա արդյունքները, անդրադարձ է կատարվել կրթության ոլորտում իրականացված աշխատանքներին և ուսումնական գործընթացի կազմակերպման առանցքային խնդիրներին, նախանշվել են նոր ուսումնական տարում կրթության կազմակերպմանն առնչվող գործընթացները։
Անդրադառնալով բուլինգի, կիբերանվտանգության, վնասակար սովորությունների կանխարգելման հարցերին՝ 2025-2026 ուսումնական տարին հայտարարվել է Անվտանգ և ապահով կրթական միջավայրի տարի։ Այս նկատառումով մշակվել է դպրոցների անվտանգության ուղեցույց, իսկ տարվա ընթացքում իրականացվելու են վերապատրաստումներ և մասնագիտական խորհրդատվություններ։ ԿԳՄՍ նախարարը հորդորել է հատուկ ուշադրություն դարձնել նաև թվային անվտանգությանն ու անձնական տվյալների պաշտպանությանը։
Խորհրդակցությունների ընթացքում շնորհակալագրեր են հանձնվել «Ամսվա լավագույնները» մրցույթի հաղթողներին, որի շրջանակներում պարգևատրվել են նաև ՀՀ տարածքային մանկավարժահոգեբանական աջակցության կենտրոնների մասնագետները։
Սիրով շնորհավորում ենք Շիրակի ՏՄԱԿ-ի մասնագետներ՝ հատուկ մանկավարժ, լոգոպեդ Սեդա Համբարյանին և Աննա Էլլարյանին, հոգեբան Մարինե Հարոյանին, սոցիալական մանկավարժ Նունե Ուռուտյանին, Վանաձորի տարածքային մանկավարժահոգեբանական կենտրոնի հատուկ մանկավարժ, լոգոպեդ Մարինե Աղաբաբյանին և Երևանի թիվ 3 տարածքային մանկավարժահոգեբանական աջակցության կենտրոնի հատուկ մանկավարժ, լոգոպեդ Լուսինե Ալթունյանին հաղթանակի առթիվ, մաղթում ենք նորանոր ձեռքբերումներ։
29.08.2025
