ՍԻՐԵԼԻ՛ ՈՒՍՈՒՑԻՉՆԵՐ
Սրտանց շնորհավորում եմ Ձեզ Ուսուցչի միջազգային օրվա առթիվ:
Այս օրը ևս մեկ առիթ է արժևորելու ուսուցչի` ներառական կրթության գաղափարն ու այն իրականություն դարձնող Ձեր ամենօրյա առաքելությունը:
Ներառականությունը միայն օրենք, ծրագիր կամ կրթական քաղաքականություն չէ։ Այն առաջին հերթին աշխարհայացք է՝ համոզմունք, որ յուրաքանչյուր երեխա արժեքավոր է՝ անկախ իր առանձնահատկություններից, կարողություններից կամ կրթական կարիքներից։
Եվ այդ աշխարհայացքի ամենակարևոր կրողներից մեկը հենց ուսուցիչն է։
Ձեր աշխատանքը չի սահմանափակվում դասագրքով, դասաժամով կամ պարզապես գիտելիք փոխանցելով․
✓ Դուք եք, որ լույս եք վառում աշակերտի աչքերում, հավատ ներշնչում նրա սրտում և ուժ տալիս՝ ճանաչելու իր հնարավորություններն ու գտնելու իր տեղը աշխարհում։
✓ Դուք եք, որ ամեն օր դասարան մտնելիս կարող եք ընտրել՝ երեխայի տարբերությունը դիտարկել որպես սահմանափակում, թե տեսնել դրա մեջ նրա յուրահատկությունն ու ներուժը։
✓ Դուք եք, որ կարող եք դասարանը դարձնել մի միջավայր, որտեղ յուրաքանչյուր երեխա իրեն ընդունված, ապահով և կարևոր է զգում։
✓ Դուք եք երեխաներին սովորեցնում ոչ միայն կարդալ, գրել ու հաշվել, այլև՝ ընդունել, հարգել, հասկանալ և աջակցել միմյանց։
Հայաստանում ներառական կրթության ճանապարհը հեշտ չի եղել։ Այն շարունակական աշխատանք, համառություն, մասնագիտական զարգացում և ամենակարևորը՝ մարդկային վերաբերմունք է պահանջել։ Եվ հենց Ձեր ամենօրյա նվիրումի շնորհիվ է, որ այսօր ավելի շատ երեխաներ հնարավորություն ունեն սովորելու իրենց հասակակիցների հետ՝ իրենց համայնքում, իրենց դպրոցում և իրենց դասարանում։
Սիրելի՛ ուսուցիչներ,
Շնորհակալ եմ Ձեր աշխատանքի, համբերատարության, հոգատարության և այն վստահության համար, որը դուք ամեն օր փոխանցում եք երեխաներին։
Մաղթում եմ Ձեզ ուժ ու ներշնչանք՝ շարունակելու Ձեր կարևոր առաքելությունը, մասնագիտական նոր ձեռքբերումներ, համբերություն՝ հաղթահարելու դժվարությունները, և այնպիսի դասարաններ, որտեղ յուրաքանչյուր երեխա կկարողանա ասել՝ «Ես այստեղ կարևոր եմ»։
Թող Ձեր աշխատանքը միշտ արժևորված լինի, իսկ Ձեր սերմանած գիտելիքն ու բարությունը վերադառնան Ձեզ Ձեր աշակերտների հաջողություններով:
Սիրով՝
ՀՄԿ տնօրեն Լիլիթ Մնացականյան
05.10.2026
