2021 թվականի փետրվարի 19-ին Հանրապետական մանկավարժահոգեբանական կենտրոնում տեղի ունեցավ կլոր սեղան-քննարկում «Մանկավարժահոգեբանական աջակցության ծառայությունների զարգացման հեռանկարները» խորագրով։
Հանդիպմանը մասնակցում էին հանրապետության տարբեր մարզերում և Երևան քաղաքում գործող ՏՄԱԿ-ների տնօրենները, ՀՀ ԿԳՄՍ նախարարության և գործընկեր կազմակերպությունների ներկայացուցիչներ Յունիսեֆի հայաստանյան գրասենյակից, «Հույսի կամուրջ» ՀԿ-ից։
Հանդիպման ընթացքում ՀՄԿ տնօրեն Արաքսիա Սվաջյանի կողմից ներկայացվեց Յունիսեֆի հայաստանյան գրասենյակի ֆինանսավորմամբ ՀՄԿ կողմից իրականացվող «Մանկավարժահոգեբանական աջակցության տրամադրումը COVID-19 համավարակի ընթացքում» ծրագրի շրջանակներում մշակված 2 փաստաթուղթ՝
➤ «Տարածքային մանկավարժահոգեբանական կենտրոնի մոդելի» նախագիծը, որը հնարավորություն կտա հանրապետությունում գործող 17 ՏՄԱԿ-ների գործունեությունն իրականացնել առավել կանոնակարգված միասնական մոտեցումներով։
➤ «Մանկավարժահոգեբանական աջակցության ծառայությունների տրամադրման կարգի» լրամշակված նախագիծը, որում ներառված բոլոր կարևոր դրույթները հնարավորություն կտան ԿԱՊԿՈՒ երեխաներին տրամադրվող մանկավարժահոգեբանական աջակցության ծառայությունները տրամադրել առավել կանոնակարգված, ինչպես նաև հաջորդ տարվանից նախադպրոցական համընդհանուր ներառական կրթության ներդրման գործընթացը սկսել սահուն և անխափան։
Հանդիպումը հագեցած էր ակտիվ քննարկումներով և մտքերի փոխանակումներով, հնչեցին բազմաթիվ հարցադրումներ և առաջարկներ։
